एहिपस्सिको बुद्ध विहार, किपुल्चामा पवित्र कथिन चिवर दान सम्पन्न
काठमाडौं,
थेरवाद बौद्ध परम्पराअनुसार गरिने पवित्र कथिन चिवर दान उत्सव अन्तर्गत बिहीबार किपुल्चा स्थित एहिपस्सिको बुद्ध विहारमा पवित्र कथिन चिवर दान सम्पन्न भएको छ । श्रद्धेय भिक्षु शरणंकर र भिक्षु पियदस्सीले वर्षावास सम्पन्न गर्नुभएको सुखद अवसरमा आइतवार बौद्ध अध्ययन पुच बलम्बुद्वारा महान् कथिन चिवर दान उत्सवको आयोजना गरिएको हो ।
वर्षावास बस्नुहुने श्रद्धेय भिक्षुलाई दाता परिवारबाट बौद्ध परम्पराअनुसार चिवर र अष्ट परिष्कार दान गर्ने प्रचलनअनुरूप आइतवार आयोजित कार्यक्रममा, सुरुवातमा दाता समूहबाट बाजागाजा र कथिन चिवरसहितको सामूहिक शोभायात्रा आयोजना गरिएको थियो । सो अवसरमा ज्ञानमाला भजन पनि प्रस्तुत गरिएको थियो । तत्पश्चात विहार प्राङ्गणमा आयोजित समारोहमा भिक्षु संघबाट शील प्रदानका साथै बुद्ध पूजा गरिएको थियो भने बुद्ध विहारका प्रमुख श्रद्धेय भिक्षु कोण्डञ्ञ महास्थविरबाट कथिन चिवर दानको महत्वबारे धर्मदेशना गरिएको थियो । धर्मदेशना लगतै कार्यक्रममा भिक्षु संघबाट वाचन गरिएको दानगाथाको अनुशरण गरी दाताद्वारा भिक्षु संघलाई कथिन चिवर दान गरिएको थियो । त्यसपछि अष्ट परिष्कार दाताद्वारा अष्ट परिष्कार दान पनि गरिएको थियो । यसरी दाताद्वारा विनयपूर्ण वर्षावास पूरा गर्नुभएका भिक्षुहरूलाई चिवर र अष्ट परिष्कार दान गर्नु उहाँहरूको श्रद्धा, सांस्कृतिक पहिचान र धर्मप्रति समर्पणको प्रतीक पनि हो । कथिन चिवर दान समारोहले बुद्ध धर्मको परम्परा र सामाजिक सद्भावको वास्तविक अनुकरण प्रस्तुत गरेको छ । विहारमा निरन्तर सञ्चालन हुँदै आएका धार्मिक, शैक्षिक र सामाजिक कार्यक्रमहरूले समुदायमा शान्ति, सहकार्य र करुणा प्रवर्द्धन गर्दै आएका छन् ।
यस्ता उत्सवहरूले नयाँ पुस्तालाई बौद्ध धर्म, परम्परा र संस्कार बुझ्न र त्यसको अभ्यास गर्नमा ठूलो सहयोग पुग्ने बताउँदै श्रद्धेय भिक्षु पियदस्सी महास्थविरले आयोजक संघप्रति साधुवाद व्यक्त गर्नुभयो । भगवान् बुद्धका शिक्षाको अनुशरण गरी गरिने यस्ता किसिमका धार्मिक समारोहहरूबाट व्यक्तिगत मात्र होइन, समाजमा पनि परोपकार र नैतिक चेतनाको विकास गर्न ठूलो सहयोग पुग्ने बताइएको छ ।