निर्वाण मूर्ति विहारमा आयोजित त्रीदिवसीय महापकरण पठ्ठानपाली पाठ समापन।
काठमाडौं,
ऐतिहासिक स्वयम्भु महाचैत्य परिसर किमडोलमा अवस्थित निर्वाण मूर्ति विहारमा आयोजित त्रीदिवसीय महापकरण पठ्ठानपाली पाठ समापन भएको छ । निर्वाण मूर्ति विहार संरक्षण समितिका अध्यक्ष श्रद्धेय धम्मवती गुरुमांको शुभ जन्मोत्सवको अवसरमा गुरुमांको आयु, आरोग्य एवम् दीर्घायुको कामना गरी विहारको धम्म कक्षमा आयोजित त्रीदिवसीय महापकरण पठ्ठानपाली पाठ शनिवार समापन भएको छ ।
विभिन्न विहारका श्रद्धेय गुरुमांहरूको सहभागिता रहेको कार्यक्रम समापनको दिन विहार प्रमुख श्रद्धेय मोलिनी गुरुमांबाट पठ्ठानपालीबारे देशना भएको थियो । कार्यक्रममा धर्मदेशना पूर्व विहारका प्रमुख गुरुमांहरू सहित विहारका आवासीय गुरुमांलगायत विभिन्न विहारबाट पाल्नुभएका श्रद्धेय गुरुमांहरूबाट क्रमसँगै पठ्ठानपाली पाठ वाचन गरिएको थियो । सो विहारमा विगतका वर्षहरूदेखि नै श्रद्धेय धम्मवती गुरुमांको शुभ जन्मोत्सवको अवसरमा र श्रद्धेय रत्नमञ्जरी गुरुमांको गुणानुस्मृतिामा विहार परिवारद्वारा पठ्ठानपाली पाठ वाचन हुँदै आइरहेको छ । सोही कार्यलाई निरन्तरता दिने क्रममा यस वर्ष पनि विहारका प्रमुख द्वय श्रद्धेय डा। मोलिनी गुरुमां र श्रद्धेय डाक्टर धम्मविजया गुरुमांको समुपस्थितिमा विहीवारदेखि पठ्ठानपाली पाठको आयोजना गरिएको हो । श्रद्धावान उपासक उपासिकाहरूको उल्लेखनीय रूपमा सहभागिता रहेको कार्यक्रमको अन्त्यमा सर्व सत्त्व प्राणी पुण्य हेतु पुण्यानुमोदनका साथै दान प्रदान गरी कार्यक्रम समापन गरिएको छ ।