विभिन्न स्थानमा गुँला पर्व विशेष धर्मदेशना लगायतका विविध धार्मिक अनुष्ठानहरू हुँदै।
काठमाडौं,
बुद्ध, एवम् बोधिसत्त्वलाई समर्पित गरी धर्म अभ्यास गर्ने पवित्र महिनाको रूपमा लिइने गुँला पर्वको अवसरमा नामसंगीति प्रज्ञापारमिता पाठ, गुँला पर्व विशेष धर्मदेशना लगायतका विविध धार्मिक अनुष्ठानहरू हुँदै आइरहेका छन् । यसैक्रममा श्रद्धेय धम्मवती गुरुमां प्रमुख रहनुभएको धर्मकिर्ति विहारमा श्रद्धेय इन्दावती गुरुमांद्वारा शील प्रदानका साथै बुद्ध पूजा भएर पेत्तवत्थु अन्तर्गत कुमार प्रेतबारे धर्मदेशना भएको थियो ।
यसैगरी गुँला पर्वको नवौं दिन भृकुटीमण्डपस्थित श्रद्धेय भिक्षु कोण्डञ्ञ महास्थविर प्रमुख रहनुभएको बुद्ध विहारमा पनि बुद्ध पूजा सहित विशेष धार्मिक अनुष्ठानको आयोजना गरिएको छ । शनिवार आयोजित कार्यक्रममा श्रद्धेय भिक्षु सुद्धिकोबाट बुद्ध पूजा भएको थियो भने श्रद्धेय भिक्षु कोण्डञ्ञ महास्थविरबाट शील प्रदान भएको थियो । विभिन्न स्थानका श्रद्धालुहरूको उल्लेखनीय सहभागिता रहेको कार्यक्रममा श्रद्धेय भिक्षु भद्दिय महास्थविरबाट मैत्रीले मात्रै द्वेषको अन्त्य गर्न सकिन्छ भन्ने विषयमा देशना भएको थियो । यसैगरी नगरमण्डपस्थित श्रीकिर्ति विहारमा आयोजित वर्षावास विशेष धर्मदेशना जारी छ । नगरमण्डप विहार परिवारद्वारा आयोजित वर्षावास विशेष धर्मदेशना कार्यक्रम अन्तर्गत शुक्रवार शाक्यमुनि किर्ति विहारका श्रद्धेय पञ्ञावती गुरुमांद्वारा समथाभावनाको महत्वबारे देशना भएको थियो । यसैगरी गुँला पर्वको अवसरमा श्रीघ विहारमा आयोजित ज्ञानमाला भजन जारी छ । ज्ञानमाला भजनको माध्यमबाट भगवान बुद्धका शिक्षालाई संसारभर फैलाउने उद्देश्यले श्रीघ ज्ञानमाला भजनखलद्वारा ज्ञानमाला भजन प्रस्तुत गरिएको हो ।
यस्तै श्रीघ परिसरमा श्रद्धेय गुरुजुहरू सहित श्रद्धालुहरूद्वारा प्रत्येक बिहान नामसंगीति पाठ भैरहेको छ । नेपाल मण्डलमा प्रचलित आर्य नामसंगीति वाचन परम्परा एउटा अमूर्त संस्कृतिको रूपमा रहेको छ । त्यसकारण हरेक महिनाको प्रतिपदा, अष्टमी, पूर्णिमा, औंशीको अवसरमा र गुँला महिनामा भने प्रत्येक बहाः बहिहरूमा दिनहुँ जसो नामसंगीति पाठ गर्ने प्रचलनअनुसार नामसंगीति पाठ गरिएको हो । एक हजार वर्षभन्दा अगाडि देखि निरन्तर रूपमा उपत्यका भित्र पाठ गर्दै आइरहेको ‘नामसंगीति’ बोधिसत्त्वहरूले गर्ने एक प्रमुख चर्याको रूपमा रहेको कारण यसलाई बुद्धत्वप्राप्तिको हेतु रूपमा लिने गरिन्छ ।