श्रद्धेय खेन्पो समन्त भद्रद्वारा बोधिचर्यावतारको शिक्षण श्रृंखला सुरु।
काठमाडौं,
व्योम कुसुमा महाविहार विशालनगरमा श्रद्धेय खेन्पो समन्त भद्रद्वारा बोधिचर्यावतारको शिक्षण श्रृंखला सुरु भएको छ ।परम पावन गुरुपाद विद्याधर आचार्य महायोगी श्रीधर राणा रिन्पोछे रत्नश्री र श्रद्धेय गुरुमांको आशीर्वाद एवम् व्योम कुसुमा बुद्ध धर्म संघको आयोजनामा श्रद्धेय खेन्पो समन्त भद्रद्वारा बोधिचर्यावतारको बारेमा शिक्षण सुरु भएको छ ।
सो कार्यक्रम केही हप्ता प्रारम्भिक शिक्षाबाट सुरु हुनेछ भने तत्पश्चातका हप्ताहरूबाट बोधिचर्यावतारको विस्तृत कक्षा निरन्तर रूपमा सञ्चालन हुनेछ । बोधिचर्यावतार महायान बौद्ध परम्पराको एक अत्यन्त प्रमुख ग्रन्थ हो । त्यसकारण बोधिचर्यावतारले करुणा र बुद्धचित्तलाई व्यवहारमा उतार्न मार्गदर्शन गर्नुका साथै दैनिक जीवनमा संयम, धैर्य र प्रज्ञा अभ्यास गर्न उत्प्रेरित गर्दछ । बोधिचर्यावतारले महायान बौद्ध मार्गमा करुणापूर्ण बोधिसत्त्व चेतना कसरी उठाउने र षट्पारमिताको अभ्यासद्वारा बुद्धत्व प्राप्त गर्ने भनेर सिकाउँदछ । श्रावण १७ गतेदेखि सुरु भएको शिक्षण कार्यक्रम बोधिपुष्पाञ्जलि हुने शनिवार बाहेक अरू दिन बिहान नौ बजेदेखि एघार बजे सम्म सञ्चालन हुनेछ । सो कार्यक्रममा संघबन्धु साधक एवम् बौद्ध शिक्षामा इच्छुक सबै श्रद्धालुहरू सहभागी हुन सक्ने व्योम कुसुमा बुद्ध धर्म संघले जनाएको छ ।