गुँलाथ्व पारुदेखि ञलाथ्व पारुसम्म मनाइने गुँला पर्वको अवसरमा धर्मदेशना, ज्ञानमाला भजन सहित नामसंगीती पाठ।
काठमाडौं,
गुँलाथ्व पारुदेखि ञलाथ्व पारुसम्म एक महिनासम्म मनाइने गुँला पर्वको अवसरमा विभिन्न धार्मिक अनुष्ठानहरूको आयोजना भैरहेको छ । बुद्ध एवम् बोधिसत्त्वलाई समर्पित गरी धर्म अभ्यास गर्ने पवित्र महिनाको रूपमा लिइने यस पर्वको अवसरमा नामसंगीति, प्रज्ञापारमिता पाठ, गुँला पर्व विशेष धर्मदेशना लगायतका विविध अनुष्ठानहरू हुँदै आइरहेका छन् । यसैक्रममा श्रीघःस्थित धर्मकीर्ति विहारमा आयोजित गुँला पर्व विशेष धर्मदेशना कार्यक्रम जारी छ ।
सो विहारमा प्रत्येक दिन विहारका प्रमुख श्रद्धेय धम्मवती गुरुमाँसहित विहारका आवासीय गुरुमाँहरूद्वारा भगवान् बुद्धका जीवनी र बुद्ध शिक्षाका विविध विषयबारे धर्मदेशना भैरहेको छ । यसैक्रममा बुधवार विहारको धर्मकक्षमा श्रद्धेय खेमावती गुरुमाँद्वारा शील प्रदानका साथै बुद्ध पूजा भएर धम्मपद अट्टकथा अन्तर्गत काणामाताबारे धर्मदेशना भएको छ । यसैगरी गुँला पर्वको अवसरमा श्रीघः विहारमा आयोजित ज्ञानमाला भजन जारी छ । भजनको माध्यमबाट भगवान् बुद्धका शिक्षालाई संसारभर फैलाउने उद्देश्यले श्रीघः ज्ञानमाला भजनखलद्वारा ज्ञानमाला भजन प्रस्तुत गरिएको हो । यस्तै श्रीघः परिसरमा श्रद्धेय गुरुज्यूहरू सहित श्रद्धालुहरूद्वारा प्रत्येक बिहान नामसंगीति पाठ भैरहेको छ । नेपाल मण्डलमा प्रचलित आर्य नामसंगीति वाचन परम्परा एउटा अमूर्त संस्कृतिको रूपमा रहेको छ । हरेक महिनाको प्रतिपदा, अष्टमी, पूर्णिमा, औंशीको अवसरमा र गुँला महिनामा भने प्रत्येक बहाः, बहिहरूमा दिनहुँ जाँसे नामसंगीति पाठ गर्ने प्रचलन रहेको छ । सोही बमोजिम श्रीघः चैत्य परिसरमा नामसंगीति पाठ गरिएको हो । यस्तै डल्लुस्थित इका बुद्ध विहारमा अखिल नेपाल भिक्षु महासंघका अध्यक्ष श्रद्धेय भिक्षु धम्मशोभन महास्थविरको समुपस्थितिमा विशेष धार्मिक अनुष्ठानको आयोजना गरिएको छ ।
विभिन्न विहारबाट पाल्नुभएका श्रद्धेय भिक्षुहरू, श्रद्धेय उपासक-उपासिकाहरूको सहभागिता रहेको कार्यक्रममा बुद्ध पूजा सहित विभिन्न धार्मिक अनुष्ठानको आयोजना गरिएको हो । सो विहारमा श्रद्धेय भिक्षु विपुल वर्षावास बस्नुभएको छ । सो अवसरमा इका विहार पुचद्वारा भिक्षुसंघलाई आमन्त्रण गरी बुद्ध पूजा सहित भोजन दान गरिएको हो । कार्यक्रमको अन्त्यमा सर्वसत्त्व प्राणीको पुण्य हेतु पुण्यानुमोदनका साथै दान प्रदान गरी कार्यक्रम समापन गरिएको थियो ।