अपरिमितायु तथागतको अगाडि सप्तविधानोत्तर पूजा गरी अभिषेक प्रदान।
काठमाडौं,
नेपालमण्डलको वज्रयानी बौद्ध धर्मका अनुयायीहरूले सर्वप्रकारं जगत हिताय भन्ने मूल भावनाका साथ संस्कृति, परम्परा अनुसार विभिन्न अवसरमा धार्मिक कार्यहरू र पूजा क्रियाविधि गर्दै आइरहेका छन्। यसैक्रममा काठमाडौंस्थित गुणाकर महाविहार छुस्याबाहलमा अपरिमितायु तथागतको सप्तविधानोत्तर पूजा गरिएको छ। यसै क्रममा नेपाल वज्रयान महाविहारका चक्रेश्वर प्रा.डा. नरेशमान वज्राचार्यको प्रमुखत्वमा पञ्च गुरुजुको सहभागितामा अपरिमितायु तथागतको अगाडि सप्तविधानोत्तर पूजा गरी अभिषेक प्रदान गरिएको छ। अमितायुसलाई महायान वज्रयान बौद्ध धर्ममा बुद्धका रूपमा पूजिने गरिन्छ। अपारमितायुसलाई मुख्य रूपमा दीर्घायु र ज्ञान प्रदान गर्ने बुद्धका रूपमा पूजा गरिन्छ। उहाँलाई ध्यान अवस्थामा चित्रित गरिन्छ भने अमृतले भरिएको पूर्ण कलश धारण गर्नु भएको हुन्छ, जुन दीर्घायु प्रदान गर्न र उहाँको शक्तिको प्रतीक मानिन्छ।
प्रायः सप्तविधानोत्तर पूजा अवलोकितेश्वर, तारा, स्वयम्भू र बोधिसत्त्वहरूको अगाडि गरिने गरिएको छ भने मंगलवार छुस्याबाहलमा अपरिमितायु तथागतको अगाडि सप्तविधानोत्तर पूजा गरिएको हो। तथागत अपारमितायुसलाई दीर्घायु, आध्यात्मिक उन्नति र शुद्धभूमिमा पुनर्जन्मको मार्ग प्रदान गर्ने तथा कर्मजन्य बाधाहरूको निवारणका लागि पूजा गरिने गरिन्छ।