गुँलापर्वलाई बुद्ध, एवम् बोधिसत्वलाई समर्पित गरि धर्म अभ्यास गर्ने पवित्र महिनाको रूपमा लिईने, ज्ञानमाला भजन सहित नामसंगीती पाठ।
काठमाडौं,
गुँलाथ्व पारुदेखि ञलाथ्व पारुसम्म एक महिना मनाइने गुँला पर्वको अवसरमा विभिन्न धार्मिक अनुष्ठानहरूको आयोजना भईरहेको छ। बुद्ध एवम् बोधिसत्त्वलाई समर्पित गरी धर्म अभ्यास गर्ने पवित्र महिनाको रूपमा लिइने यस पर्वको अवसरमा नामसङ्गीति, प्रज्ञापारमिता पाठ, गुँला पर्व विशेष धर्मदेशना लगायतका विविध अनुष्ठानहरू हुँदै आइरहेका छन्। यसैक्रममा श्रीघःस्थित धर्मकीर्ति विहारमा आयोजित गुँला पर्व विशेष धर्मदेशना कार्यक्रम जारी छ।
सो विहारमा प्रत्येक दिन विहारका प्रमुख श्रद्धेय धम्मवती गुरुमां सहित विहारका आवासीय गुरुमाहरूद्धारा भगवान बुद्धका जीवनी र बुद्ध शिक्षाका विविध विषयबारे धर्मदेशना भईरहेको छ। यसैक्रममा मंगलवार विहारको धर्मकक्षमा श्रद्धेय केशवती गुरुमांद्धारा शील प्रदानका साथै बुद्धपूजा भई धम्मपद अट्ठकथा अन्तर्गत लकुण्डक भद्दिय स्थविरबारे धर्मदेशना भएको छ। यसैगरी गुँला पर्वको अवसरमा श्रीघः विहारमा आयोजित ज्ञानमाला भजन जारी छ। भजनको माध्यमबाट भगवान बुद्धका शिक्षालाई संसारभर फैलाउने उद्देश्यले श्रीघः ज्ञानमाला भजनखलद्धारा ज्ञानमाला भजन प्रस्तुत गरिएको हो। यस्तै श्रीघः परिसरमा श्रद्धेय गुरुजुहरू सहित श्रद्धालुहरूद्धारा प्रत्येक विहान नामसङ्गीति पाठ भईरहेको छ। एक हजार वर्षभन्दा अगाडि देखि निरन्तर रूपमा उपत्यकाभित्र पाठ हुँदै आइरहेको ‘नामसङ्गीति’ बोधिसत्त्वहरूले गर्ने एक चर्याको रूपमा रहेको कारण यसलाई बुद्धत्व प्राप्तिको हेतु समेत भनिन्छ। नामसङ्गीतिमा आर्य मञ्जुश्रीका आठ सयभन्दा बढी नामहरू सङ्ग्रहित रहेका छन्।
नामसङ्गीतिमा वज्रपाणि बोधिसत्त्वले शाक्यमुनि बुद्धलाई अनुरोध गर्नुभएको अध्येषणा गाथा, प्रतिवचन गाथा, मायाजाल अभिसम्बोधि, पञ्चज्ञान सहित १५ अध्यायहरू समावेश गरिएका छन्। नेपालमण्डलमा प्रचलित आर्यनामसङ्गीति वाचन परम्परा एउटा अमूर्त संस्कृतिको रूपमा रहेको छ। हरेक महिनाको प्रतिपदा, अष्टमी, पूर्णिमा, औंशीको अवसरमा र गुँला महिनामा भने प्रत्येक बहाः–बहिहरूमा दैनिक जासे नामसङ्गीति पाठ गर्ने प्रचलन रहेको छ। सोही बमोजिम श्रीघः चैत्य परिसरमा नामसङ्गीति पाठ गरिएको हो।