बुद्ध विहारमा गुँला पर्व विशेष धर्मदेशना दिने क्रममा श्रद्धेय गुरुमाले आनन्द स्थविरको जीवनीबारे धर्मदेशना।

img

काठमाडौं,
नेवाः बौद्ध समुदायमा महत्वपूर्ण मानिने गुँला पर्वको अवसरमा विभिन्न स्थानमा रहेका विहारहरूमा भगवान बुद्धका विविध विषयमा गुँला पर्व विशेष धर्मदेशना कार्यक्रम भईरहेको छ। यसैक्रममा श्रद्धेय वीर्यवती गुरुमाबाट भिक्षु आनन्द स्थविरको संक्षिप्त जीवनीबारे धर्मदेशना भएको छ। श्रद्धेय भिक्षु कोण्डञ्ञ महास्थविर प्रमुख रहनु भएको बुद्ध विहारमा गुँला पर्व विशेष धर्मदेशना दिने क्रममा श्रद्धेय गुरुमाले आनन्द स्थविरको जीवनीबारे धर्मदेशना दिनुभएको हो। 
नेवाः बौद्ध एक महिनासम्म विविध धार्मिक अनुष्ठानको आयोजना गरेर मनाइने गुँला पर्वको अवसरमा सो विहारमा एक महिने गुँला पर्व विशेष धर्मदेशना आयोजना भईरहेको छ। सोही कार्यक्रमको पाँचौँ दिन धर्मकीर्ति विहारका आवासीय श्रद्धेय वीर्यवती गुरुमाले आनन्द स्थविरको जीवनीबारे धर्मदेशना दिनुभएको हो। सो क्रममा उहाँले शाक्यमुनि बुद्धको पालामा धर्मका क्षेत्रमा एकतग्ग प्राप्त भिक्षुहरू मध्ये भिक्षु आनन्द स्थविरको संक्षिप्त जीवनी र उहाँले पाँच वटा क्षेत्रमा एकतग्ग प्राप्त गर्नुभएको बारेमा देशना दिनुभएको थियो। भिक्षु आनन्दलाई भगवान बुद्धले बहुश्रुत, स्मृतिवान्, धर्मभण्डागारिक ज्ञानले सम्पन्न, धैर्यवान् र सेवाभावमा एकतग्ग पद दिनुभएको थियो। भिक्षु आनन्द स्थविरले अत्यन्त श्रद्धापूर्वक र जिम्मेवारीका साथ आफ्नो कर्तव्य निर्वाह गरी भगवान बुद्धलाई जीवनको अन्त्यसम्म साथ दिनुभएको थियो। जब महाप्रजापती गौतमी र अन्य महिलाहरूले भिक्षुणी बन्ने अनुमति माग्नुभएको थियो सो समयमा आनन्दले बुद्धलाई सघाउनुभएर भिक्षुणी सङ्घको स्थापना गर्नुभएको थियो। त्यसकारण भिक्षु आनन्दको महिलाहरूलाई सङ्घमा प्रवेश गराउने विषयमा पनि ठूलो योगदान रहेको छ। 
धर्मदेशना दिनु पूर्व कार्यक्रममा श्रद्धेय भिक्षु सद्धिको बाट बुद्ध पूजा भएको थियो भने विहार प्रमुख श्रद्धेय भिक्षु कोण्डञ्ञ महास्थविरबाट शील प्रदान भएको थियो। अन्त्यमा सर्वसत्त्व प्राणी पुण्य हेतु पुण्यानुमोदनका साथै दान प्रदान गरी कार्यक्रम समापन गरिएको थियो। गुँला पर्वको मुख्य उद्देश्य भनेको नै बौद्ध धर्मका अनुयायीहरूको चित्त शुद्धि, धार्मिक आस्था बलियो बनाउनु र पुण्य कमाउनु हो। सोही बमोजिम विहारमा धार्मिक अनुष्ठानको आयोजना गरिएको हो।