चक्रेश्वर आजु बुद्धिराज बज्राचार्यको गुणानुस्मरणमा श्रद्धाञ्जली सभाको आयोजना।
काठमाडौं,
बौद्ध विहार संघ ललितपुरका संस्थापक समाजसेवी, पूर्वमन्त्री एवम् तत्कालीन ललितपुर नगरपालिकाका प्रमुख चक्रेश्वर आजु बुद्धिराज बज्राचार्यको गुणानुस्मरणमा श्रद्धाञ्जली सभाको आयोजना गरिएको छ । ललितपुरमा अवस्थित यशोधरा महाविहार परिसरमा आइतवार श्रद्धाञ्जली सभाको आयोजना गरिएको हो । आधुनिक ललितपुरको जग बसाल्नुहुने दिवंगत बुद्धिराज बज्राचार्यको श्रद्धाञ्जली सभाका वक्ताहरूले उहाँको योगदानलाई भावी पुस्ताका लागि स्मरणीय बनाइराख्न ठोस काम गर्नुपर्ने खाँचो औँल्याउनुभएको छ ।
बौद्ध विहारको संयोजनमा ललितपुरका २७ वटा संघसंस्थाले आइतबार उहाँको जन्मस्थल यशोधरा महाविहार बुभालमा आयोजित सभामा उहाँहरूले यस्तो बताउनुभएको हो । सो अवसरमा प्रधानमन्त्री केपी शर्मा ओलीले पठाउनुभएको शोक वक्तव्य पनि वाचन गरिएको थियो । सभामा पूर्व उपप्रधानमन्त्री एवं गृहमन्त्री नारायणकाजी श्रेष्ठले बुद्धिराज बज्राचार्य एक राजनीतिकर्मी भएपनि व्यक्तित्वको मुख्य पक्ष भने सामाजिक तथा सांस्कृतिक र सम्पदा जोगाउने प्रतिबद्ध व्यक्तिका रूपमा रहेको धारणा राख्नुभयो । यस्तै सभामा शिक्षामन्त्री रघुजी पन्त, वाग्मती प्रदेश श्रम, रोजगार तथा यातायात मन्त्री प्रेमभक्त महर्जन, ललितपुर क्षेत्र नं २ का संघीय सांसद् प्रेमबहादुर महर्जन, वाग्मती प्रदेशसभाका सदस्य शैलेन्द्रमान बज्राचार्यले दिवंगत बुद्धिराज बज्राचार्यको जीवनीबारे चर्चा गर्नुभएको थियो ।
सो क्रममा उहाँहरूले दिवंगत बज्राचार्यलाई ललितपुरको कला, संस्कृति र सम्पदा संरक्षकका रूपमा एक धरोहर रहेको बताउँदै उहाँको योगदानलाई चिरकालसम्म सम्झिरहने वातावरण तयार गर्न सालिक बनाउनुपर्ने सुझाव दिनुभएको थियो । यस्तै ललितपुर महानगरपालिकाका मेयर चिरिबाबु महर्जनले पञ्चायतकालमा आफू दुई पटक वडाअध्यक्ष हुँदा बज्राचार्य प्रधानपञ्च रहेको र उहाँसँगै काम गरेर आफ्नो राजनीतिक करियरको आधारशीला तयार भएको बताउनुभयो । यसैगरी उहाँले बज्राचार्यको जीवनी सम्बन्धी पुस्तक ललितपुर महानगरपालिकाले प्रकाशित गरिदिने पनि आश्वासन व्यक्त गर्नुभयो । सो अवसरमा २७ वटा संघसंस्थाले संयुक्त रूपमा तयार पारेको समवेदनापत्र बज्राचार्यका परिवारलाई प्रदान गरिएको थियो । सभामा बौद्ध विहार संघका अध्यक्ष करुणारत्न बज्राचार्यले बुद्धिराज बज्राचार्य एक बहुआयामिक व्यक्तित्व रहेको चर्चा गर्नुभयो ।
कार्यक्रममा ललितपुर विकासका लागि समाजका अध्यक्ष विकासरत्न धाख्वाले बज्राचार्यको सक्रियतामा पुनर्निर्माण भएको सम्पदाको विषयमा जानकारी दिनुभयो । श्रद्धाञ्जली सभामा सबै बौद्ध परम्पराअनुसार श्रद्धेय भिक्षु, श्रद्धेय लामा गुरु र श्रद्धेय बज्राचार्य गुरुजुहरूबाट पाठ गरिएको थियो । विक्रम संवत १९९३ श्रावण २७ गते जन्मनुभएका बुद्धिराज बज्राचार्यको विक्रम संवत २०८२ श्रावण २ गते ८९ औं वर्षको उमेरमा देहावसान भएको थियो । बोधि टेलिभिजन परिवार दिवंगत चक्रेश्वर आजु बुद्धिराज बज्राचार्यको सुगति सहित निर्वाण कामना गर्दछ ।