भगवती प्रज्ञापारमिता हृदयसूत्रको नेपाली अनुवाद विमोचन

बोधी संवाददाता
काठमाडौं, कार्तिक २१ । बौद्ध धर्मगुरु परम पुजनीय क्याब्जे शेछेन राब्ज्याम रिन्पोछेले आज बुधबार यहाँ बुद्ध बचनहरुको संग्रह त्रिपिटक अन्तर्गतको भगवती प्रज्ञापारमिता हृदयसूत्रको नेपाली अनुवादको विमोचन गर्नुभयो ।
उहाँले प्रज्ञापामिता सुत्रबारे उपदेश दिँदै बुद्ध धर्म कुनै कल्पना नभई एक विज्ञान भएकोले आज संसार भरी यसको महत्व बुझ्ने तथा अवलम्बन गर्नेहरुको संख्या दिनानुदिन बढ्दै गइरहेको बताउनुभयो । नेपालीहरुले बुद्धधर्मको मर्म बुझेर यसलाई आफ्नो जीवनमा लागु गर्न पनि उहाँले सुझाव दिनुभयो ।

कार्यक्रममा प्रज्ञापारमिता सुत्रको नेपाली भाषामा अनुवाद कार्यमा रु एक लाखदेखि माथि सहयोग गरेका दाताहरुलाई रिन्पोछेबाट अभिनन्दन पनि गरिएको थियो ।

संस्कृति, पर्यटन तथा नागरिक उडड्यन राज्यमन्त्री माननीय धन बहादुर बुढा मगरले नेपाली भाषामा बुद्ध बचनहरु अनुवाद हुनु भनेको सबै नेपालीहरुको लागि गर्वको विषय भएको बताउनुभयो ।

त्यस्तै नेपाल बौद्ध महासंघका अध्यक्ष आचार्य कर्मा रिन्छेनले देव अवतरण दिवसको महत्व बारे संक्षिप्त जानकारी दिनुभयो भने खेन्पो निमा सिंगे लामाले प्रज्ञापरमिता सुत्रको महत्वबारे संक्षिप्त चर्चा गर्नुभयो ।

कार्यक्रममा सभापति एवं बुद्धवचन अनुवाद समिति नेपालका अध्यक्ष अनुवादक टिका शेर्पाले समितिको कामको चर्चा गर्दै यस कार्यमा सबैको सहयोगको अपेक्षा गर्नुभयो ।
उक्त कार्यक्रमको आयोजना बुद्धवचन अनुवाद समिति नेपालले गरेको थियो ।

 

2 years ago/Wednesday, November 7th, 2018 /