त्रिपिटकका तीनवटा अनुवादित ग्रन्थहरुको विमोचन

बोधी संवाददाता
ललितपुर, बैशाख २२ । बुद्धबचनहरुको पवित्र सँगालो त्रिपिटकभित्रका महत्वपूर्ण ग्रन्थहरु मध्ये हालै नेपालभाषामा अनुवाद भएका तीनवटा ग्रन्थहरुको आज यहाँ एक समारोहका बिच विमोचन भयो ।
शताब्दी पुरुष सत्यमोहन जोशीले पालि–नेपालभाषा शब्दकोशको, उपसंघनायक अग्गमहापण्डित डा. ज्ञानपूर्णिक महास्थविरले विनयपिटकको महावग्ग तथा अभिधम्मपिटकको यमक ग्रन्थको विमोचन गर्नभयो ।

ती ग्रन्थहरुमध्ये शब्दकोशको मुख्य सम्पादक भएर दुण्डबहादुर वज्राचार्यले काम गर्नुभएको थियो भने महावग्गको अनुवाद उत्पलवर्णा गुरुमांले तथा यमकको अनुवाद विमलञाणी गुरुमांले गर्नुभएको थियो ।
कार्यक्रममा बोल्दै ललितपुर महानगरपालिकाका मेयर चिरिबाबु महर्जनले ललितपुरमा रहेका प्राचिन बौद्ध सम्पदाको संरक्षण गर्ने हामी सबैको जिम्मेवारी भएकोले नगरपालिका यस्ता काममा स्थानीय जनताको साथ दिन सँधै तयार रहेको बताउनुभयो ।

ज्ञानपूर्णिक महास्थविरले नेपालमा पनि त्रिपिटकको ग्रन्थहरु अनुवाद हुन थालेको एकदम राम्रो कुरा भएको बताउँदै बुद्धबचनहरुको अध्ययनबाट मात्रै बुद्ध किन र कति महान् हुनुहुन्छ भन्ने सर्बसाधारणले बुझ्न सक्छ भन्नुभयो ।

शताब्दीपुरुष जोशीले नेपालमा शब्दकोश निर्माणको इतिहास बताउँदै यस्तो कोशले भविष्यमा भाषा अध्ययन गर्न तथा अनुवाद गर्नको लागि ढोका खोल्ने साँचोको काम गर्ने बताउनुभयो ।

 

साथै कार्यक्रमममा अनुवादकहरु मध्येबाट विमलञाणीले अनुवाद गर्दाको कठिनाइ तथा सुख अनुभवको बारेमा बताउनुभयो ।

3 years ago/Saturday, May 5th, 2018 /